Genesis 7
Ejemba ano oro kuuya ii waŋgonoŋ ugi.
1Nooanoŋ waŋgo medabororo Poŋnoŋ qaa kokaeŋ ijoro: “Gii ejemba tuuŋ koi yoŋoo batugianoŋ solaŋa kolooŋ laligojaŋ. Niinoŋ goo kanaga kaeŋ mokoloojeŋ. Kawaajoŋ gii ano sumaŋuruga kuuya oŋo mono waŋgonoŋ ubu. 2Oro neneya, doŋqiziziŋgia qaa ii kuuya yoŋoonoŋa sewen sewen, ejia 7 ano embia 7:baa so oŋoona goonoŋ koubu. Kaaŋagadeeŋ oro aŋgojoragiawo kuuya yoŋoonoŋga woi woi ejia ano embia kaaŋa oŋoona goonoŋ koubu. 3Toroqeŋ kooŋ kania kania kuuya yoŋoonoŋga kaaŋagadeeŋ sewen sewen, ejia 7 ano embia 7 ii oŋoona giwo waŋgonoŋ ubu. Kaeŋ ana oro ano kooŋ tanigia kania kania kuuya ii mende qaombuto, toroqeŋ namonoŋ kolooŋ seisei ama laligowuya. 4Ugi weemboria 7 tegoro jeŋ kotowe koŋ rombuŋ somatanoŋ mono namonoŋ kamaaro gomantiiŋa weemboria 40:waa so toroqeŋ koŋ kiwaa. Kaeŋ kiro iwoi isiŋosoŋgiawo kuuya namonoŋ mokolooŋ oŋombeti, ii mono motooŋ jeŋ tegowe qaombuya.” 5Poŋnoŋ Nooa kaeŋ ambaatiwaajoŋ jeŋ kotoŋ muro iikawaa sogadeeŋ mono teŋ koma ii kuuya andabororo.6Kaeŋ ama mero Nooawaa yambuyanoŋ 600 kolooro gboulu somatanoŋ namo qaganoŋ kouro. 7 a Koubaatiwaajoŋ ano Nooa embiawo ano mera eŋarourugara yoŋonoŋ motooŋ gboulunoŋ komuwubotiwaajoŋ oloŋ koma waŋgonoŋ ugi. 8Kaaŋagadeeŋ oro neneya, doŋqiziziŋa ano oro aŋgojoragiawo ano kooŋ ano iwoi kuuya bagianoŋ koma kondondoŋgoŋkejuti, 9ii woi woi kuuya ejia ano embia ii sogianoŋ kaŋ waŋgonoŋ Nooawaanoŋ ugi. Anutunoŋ Nooa jeŋ kotoŋ muroti, ii mono iikawaa so kolooro. Kiaŋ.
Gboulunoŋ ejemba turuŋ oŋono komugi.
10Kaeŋ kolooro weemboria 7:baajoŋ jeroti, ii tegoro gboulu somatanoŋ baloŋ qaganoŋ kouro. 11 b Nooawaa yambuyanoŋ 600 kolooro yambu iikawaa koiŋa 2 kawaa weemboria jaŋgo 17 kanoŋ apu jaaya kuuya, apu diiŋgiawo iikawaa nemuŋgia kuuya ii emugeŋga somariiŋ boŋguŋ waagi. Kaaŋagadeeŋ eukanoŋ kanakeewambaa apuya iikawaa qaa oogia ii aantaŋgi. 12Koŋ rombuŋ somata ii balonoŋ kamaaŋ kiŋ ero kema gomantiiŋa asaga 40 keno. 13Koŋnoŋ kanaiŋ kimambaajoŋ ano weemboria kanoŋ Nooa ano merauruta Seem, Haam ano Jaafet, Nooa embiawo ano eŋarourugara karooŋ yoŋonoŋ motooŋ waŋgonoŋ udaborogi. 14Toroqeŋ duuyaa oroya ano miriwaa oroya kuuya, iwoi kuuya bagianoŋ koma kondondoŋgoŋkejuti, kooŋ kuuya ano iwoi eŋgaŋgiawo kuuya ii ejemba yoŋowo motooŋ waŋgonoŋ udaborogi. 15Anutunoŋ iwoi kuuya mokolooŋ oŋono laaligowaa aasoŋ horoŋkejuti, iyoŋoonoŋga woi woi (2-2) ii Nooawaanoŋ kouma waŋgonoŋ udaborogi. 16Anutunoŋ Nooa jeŋ kotoŋ murotiwaa so iwoi isiŋosoŋgiawo kuuya waŋgonoŋ udaborogiti, ii ejia ano embia koloori. Kuuyanoŋ udaborogi Poŋ aŋo Nooawaa gematanoŋ waŋgowaa naguya kono.17Naguya kono iikanondeeŋ gboulu somatanoŋ kanaiŋ gomantiiŋa asaga 40:waa so toroqeŋ namonoŋ waaro. Apunoŋ somariiŋ waama baloŋ koma turuŋ uma waŋgo namonoŋa metaano uro. 18Uro apunoŋ baloŋ qaganoŋ somariiŋ saa qeŋ ugi waŋgonoŋ apu qaganoŋ aŋodeeŋ eeŋ laŋ kema karo. 19Kaeŋ kolooro apunoŋ baloŋ qaganoŋ mombo somariiŋ uro. Baaŋa koriga koriga sombiŋ baatanoŋ nama kenjuti, ii kuuya musuluŋgoŋ oŋono. 20Musuluŋgoŋ oŋoma uma baaŋa kuuya koma turuŋ 8 miita (25 fiit) kawaa so uŋuuguŋ ero.
21Kaeŋ ero iwoi isiŋosoŋgiawo kuuya namo qaganoŋ kema kaŋ laligogiti, iyoŋonoŋ apu nemotoŋ komudaborogi. Iwoi kuuya ii kooŋ me miriwaa oroya me duuyaa oroya me mokoleŋ, lagiso ano iwoi kuuya tuuŋ meŋ balonoŋ qeqelala kema kaŋkejuti ano ejemba kuuya ii motooŋ qaondaborogi. 22Iwoi kuuya baloŋ toboganoŋ laligoŋ laaligowaa aasoŋa sewaŋgianoŋ horoŋ laligogiti, ii koreyanoŋ komudaborogi. 23Iwoi laaligogiawo kuuya namonoŋ laligogiti, ii Anutunoŋ uŋudabororo. Iwoi kuuya ii ejemba, oro me iwoi bagianoŋ koma kondondoŋgoŋkejuti me kanakeewambaa kooŋa kooŋa ii mono Anutunoŋ uŋudabororo. Nooa ano sumaŋuruta waŋgo uutanoŋ laligogiti, iyoŋogadeeŋ mono iŋiima kobooŋ aŋgoŋ koma gou gajogia kono. 24Apu gboulu kanoŋ baloŋ qeŋ turuŋ mende horoŋ kemeroto, weemboria 150:waa so ero.
Copyright information for
KSR